सिन्धुपाल्चोकमा माओवादी स्थायी समितिको बैठक जारी बैठकको समय लम्बिन सक्ने

प्रकाश सुन्दास चैत १९ काभ्रे /

माओवादी स्थायी समितिको बैठक सिन्धुपाल्चोक सुकुटेमा जारी रहेको छ । सुनकोशी नदीको किनारमा रहेको इक्वेटर विच रिसोर्टमा हिजोदेखि जारी बैठकमा आज बाँकी सदस्यहरुले आफ्नो धारणा राख्नुहुनेछ ।  आज बाँकी सदस्यहरुले भनाई राखेपछि अध्यक्ष पुष्पकमल दाहाल प्रचण्डले सुझावलाई समेटेर भनाई राख्नुहुनेछ । पहिलो चरण अन्तर्गत सबै स्थायी समिति सदस्यहरुले बोल्ने क्रम नसकिएकाले आज सकिने तय भएको बैठकको समय लम्बीन सक्ने नेताहरुले बताएका छन् ।

 बैठकमा उपाध्यक्षद्धय मोहन वैद्य  किरण र डा।बाबुराम भट्टराईले यसअघि अध्यक्षको विपक्षमा राख्दै आउनु भएको फरक प्रस्तावको अडान कायम राख्नु भएको छ । उपाध्यक्ष वैद्यले पार्टीको भ्रातृ संगठनमा देखिएको विवादलाई तत्काल समाधान गरि जनविद्रोहका लागि आधार तयार गर्नुपर्ने बताउनु भएको छ । त्यस्तै अर्का उपाध्यक्ष भट्टराईले आफ्ना विचार पार्टीको तल्लो तहसम्म पुर् याउन खोज्दा पार्टी भित्रबाटै घेराबन्दी गर्न खोजिएको भन्दै असन्तुष्टी जनाउनुभएको छ ।

माओवादी स्थायी समिति बैठकमा नेपाली काँग्रेसले संसदमा गरिरहेको अवरोध पुरक बजेट शान्ति र संविधान निर्माण सरकारमा पठाउने मन्त्रीको छनौटका विषयमा छलफल हुनेछ ।  त्यस्तै संवैधानिक उपसमितिको संयोजक कसलाई बनाउने पार्टीको मजदुर संगठन भित्रको विवाद समाधान स्वयंसेवी दस्ताको परिचालनजस्ता महत्वपूर्ण विषयमा निर्णय गर्ने बैठकको व्यवस्थापन गरिरहनु भएका पोलिटब्यूरो सदस्य अग्नीप्रसाद सापकोटाले टेलिफोनबाट जानकारी दिनु भएको छ ।