होटल मदजुर भलिबलको फाईनलमा प्रवेश

  माघ  २९  पोखरा।अखिल नेपाल ट्रेड युनियन महासंघ, कास्कीले जनयुद्धको १६ औं वार्षिकोत्सवको अवसरमा आयोजना गरेको दोस्रो भलिबल प्रतियोगिता अन्तर्गत शनिबार विभिन्न चरणका खेलहरु सम्पन्न भएका छन् ।
शनिबार भएको प्रतियोगिताबाट अखिल नेपाल होटल तथा रेष्टुराँ मजदुर संघ, कास्की फाईनलमा प्रवेश गरेको छ ।

सेमिफाईनल खेलमा यातायात मजदुर र धातु मजदुरको संयुक्त टीमलाई २५–२७, १३–२५, २५–२२ र १८–२५ को सेटमा हराउदै होटल मजदुरको टिम फाइनलमा प्रवेश गरेको हो । प्रतियोगितामा अन्य चरणका खेल बेस्ट आफ थ्रि, फाइनल र सेमिफाइनल खेल बेस्ट अफ फाईभका आधारमा खेलाएको बताएको छ । शनिबार नै एकीकृत माओवादी तमुवान राज्य कार्यालय र क्यासिनो ग्राण्डबीच भएको सेमिफाईनल खेल भने अध्यारो भएका कारण ड्र भएको छ । खेल पुनः आईतबार हुने बताइएको छ ।

यसअघि शनिबार नै होटल मजदुर जिल्ला समितिले पर्यटन मजदुरलाई, क्यासिनो ग्राण्डले क्यासिनो फुलबारी मजदुरलाई, यातायात र धातु मजदुरको संयुक्त टिमले स्वास्थ्य श्रमिकलाई र राज्य कार्यालयले औद्योगिक मजदुरलाई पराजित गरेर  सेमिफाईनलमा प्रवेश गरेका थिए ।

दोस्रो चरणको खेलबाट यातायात तथा धातु मजदुरले नेपाल राष्ट्रिय कर्मचारी संगठनलाई, क्यासिनो ग्राण्ड मजदुरले लेखनाथ ईलाकालाई, स्वास्थ्य श्रमिकले सेक्युरिटी मजदुर संघलाई, फुलबारी क्यासिनो मजदुरले पसल मजदुर संघलाई र राज्य कार्यालयले होटल फुलबारी मजदुर लाई पराजित गरेर क्वार्टरफाईनलमा प्रवेश गरेका थिए ।

आईतबार राज्य कार्यालय र क्यासिनो ग्राण्डबीच हुने प्रतिस्पर्धाबाट विजयी हुने टिम र अखिल नेपाल होटल तथा रेष्टुराँ मजदुर संघ कास्की बीच फाईनल खेल हुने छ । शुक्रबार प्रतियोगिताको उद्घाटन एकीकृत नेकपा माओवादीका तुमवान ईञ्चार्ज हितराज पाण्डे (उत्तम) ले गर्नुभएको थियो ।