जातीय विभेद अन्त्य गर्न बैतडीका निगरानी समूह सक्रिय

भगीरथ अवस्थी फागुन २४ बैतडी ।

वर्षौंदेखि चल्दै आएको जातीय विभेदलाई अन्त्य गर्न बैतडीका विभिन्न गाविसमा गठन भएका निगरानी समुहहरु सक्रिय भएका छन् । समाजमा रहेको छुवाछुत प्रथालाई अन्त्य गर्न तथा दलितका पक्षमा वकालत गर्न गठित निगरानी समुहहरुले दलितमुखी कार्यक्रमहरुलाई प्रभावकारी बनाउन सहयोग गरिरहेका छन् । बैतडीका ५ ओटा गाविसमा गठन भएका समुहहरुले गाउँपरिषदबाट दलितको पक्षमा बजेट छुट्याउन समेत सफल भएका छन् । मेलौली, महारुद्र, न्वाली, सित्तड, र गुरुखोला गाविसमा गठन भएका निगरानी समुहहरुले दलितहरुमाथि हुने विभिन्न भेदभावलाई न्युनीकरण गर्न पैरवी गरिरहेको दलित गैरसरकारी संस्था महासंघ बैतडीका कार्यक्रम संयोजक तेजराम लोहारले बताउनु भएको छ ।